मुंबई: विधानसभा निवडणुकीत दणदणीत विजय मिळवल्यानंतर, महायुतीमधील सर्वात मोठा पक्ष ठरल्यानंतर आता भारतीय जनता पक्षानं स्वबळ आजमवण्याची तयारी सुरु केली आहे. विधानसभा निवडणुकीत भाजपनं १३२ जागा जिंकल्या. भाजपचा स्ट्राईक रेट ९० टक्के राहिला. इतकं घवघवीत यश भाजपला २०१४ मध्ये मोदी लाटेतही मिळालं नव्हतं. लोकसभेला राज्यात भाजपचं पानीपत झालं. त्यानंतर विधानसभेसाठी राष्ट्रीय स्वयंसेवक संघ सक्रिय झाला. संघाच्या ताकदीच्या जोरावरच भाजपनं विधानसभेला सव्वाशेचा आकडा ओलांडला. त्यानंतर आता स्थानिक स्वराज्य संस्थांच्या निवडणुकांसाठी भाजपनं जोरदार तयारी सुरु केली आहे. त्यासाठी बैठकांचं सत्र सुरु आहे.
स्थानिक स्वराज्य संस्थांच्या निवडणुकांमध्ये भाजप एकला चलो रेचा नारा देण्याच्या तयारीत आहे. विधानसभेला भाजपनं शिवसेना, राष्ट्रवादी काँग्रेसच्या सोबतीनं निवडणूक लढवली. तिन्ही पक्षांनी मिळून २८८ पैकी २३० जागा जिंकल्या. यानंतर आता भाजपनं स्वबळ आजमवण्याची तयारी केली आहे. भाजप आणि संघाशी संबंधित सगळ्या संघटना, संस्था, आघाड्यांची भाईंदरमध्ये एक बैठक झाली. या बैठकीला मुख्यमंत्री देवेंद्र फडणवीस आणि प्रदेशाध्यक्ष चंद्रशेखर बावनकुळे उपस्थित होते.
विधानसभा निवडणुकीतील विजयात संघाचा मोठा वाटा होता. त्यावर बैठकीत चर्चा झाली, अशी माहिती भाजपच्या वरिष्ठ पदाधिकाऱ्यांनी दिली. भाजपच्या नेत्रदीपक यशात संघाचा मोठा वाटा असल्याचा निष्कर्ष या बैठकीत काढण्यात आला. त्याच कामगिरीची पुनरावृत्ती करायची असल्यास भाजपला संघाच्या सगळ्या संघटनांच्या मदतीची गरज भासेल. कारण संघ परिवारातील संघटनांचं जमिनीवरील जाळं मोठं आहे. इंडियन एक्स्प्रेसनं याबद्दलचं वृत्त दिलं आहे.
राज्यातील अनेक महानगरपालिका, नगर परिषदा, जिल्हा पंचायतींच्या निवडणुका प्रलंबित आहे. येत्या काही महिन्यांत २७ पालिकांच्या निवडणुका होणार आहेत. त्यात मुंबई, ठाणे, नवी मुंबईसारख्या महत्त्वाच्या महापालिकांचा समावेश आहे. सध्या जवळपास सगळ्याच स्थानिक स्वराज्य संस्थांचं कामकाज प्रशासन पाहतं. गेल्या २५ वर्षांपासून मुंबई महापालिकेवर शिवसेनेचं वर्चस्व राहिलं आहे. त्याच वर्चस्वाला शह देण्याचा भाजपचा प्रयत्न आहे. महापालिकेत उद्धव ठाकरेंच्या पक्षाला अपयश आल्यास ते राजकारणात आणखी बॅकफूटवर फेकले जातील.
विधानसभा निवडणुकीवेळी गृहमंत्री अमित शहांनी भाजप पदाधिकाऱ्यांशी संवाद साधताना पुढील निवडणुकीनंतर भाजप स्वबळावर सत्तेत असेल असं म्हटलं होतं. त्यामुळेच आगामी विधानसभा भाजप स्लबळावर लढणार असल्याचं स्पष्ट आहे. त्याची तयारी भाजपनं आतापासूनच सुरु केली आहे. भाजपनं स्वबळासाठी टाकत असलेली पावलं मित्रपक्षांसाठी धोक्याची घंटा मानली जात आहे.
