अमरावती : विधानसभा निवडणुकीदरम्यान जिल्ह्यात महायुतीतील घटक पक्षांमधील बेबनाव उघडपणे समोर आला. पण, आता सत्ता स्थापनेनंतर देखील ही धुसफूस सुरूच आहे. दर्यापूर विधानसभा मतदारसंघातील शिवसेना शिंदे गटाचे उमेदवार अभिजीत अडसूळ यांना पराभव पत्करावा लागला.
यात महायुतीतील घटक असलेल्या युवा स्वाभिमान पक्षाचे आमदार रवी राणा यांनी अडसूळ यांच्या विरोधात उमेदवार दिल्याने अडसूळ यांचा पराभव झाल्याची खंत शिवसेना शिंदे गटाचे कार्यकर्ते अजूनही व्यक्त करतात. आता स्थानिक स्वराज्य संस्थांच्या निवडणुकांसाठी विविध पक्षांनी मोर्चेबांधणी सुरू केली असताना पुन्हा एकदा महायुतीतील संघर्ष पुन्हा एकदा उफाळून येण्याची शक्यता आहे.
महापालिका निवडणुकीच्या अनुषंगाने शिवसेना शिंदे गटाच्या मेळाव्याचे आयोजन करण्यात आले. यावेळी प्रसार माध्यमांशी बोलताना अभिजीत अडसूळ यांनी राणा दाम्पत्याचे नाव न घेता त्यांच्यावर टीका केली. अभिजीत अडसूळ म्हणाले, महायुतीत तोंड दाबून बुक्क्यांचा मार सुरू आहे.
आमच्या पक्षश्रेष्ठींनी कुणाच्याही विरोधात बोलू नका, असे आम्हाला सांगितले होते. पण, आमच्या विरोधात मित्रपक्षानेच उमेदवार दिला. उमेदवाराला पक्षातून काढल्या गेले, पण त्यांचा प्रचार करणाऱ्या स्टार प्रचारक, आमदार किंवा पदाधिकाऱ्यांवर कुठल्याही प्रकारची कारवाई झाली नाही. लोकांमध्ये त्यावेळी महायुतीचा नक्की उमेदवार कोण, याविषयी चुकीचा संदेश गेला आणि त्याचा फटका आम्हाला बसला. आम्ही विरोधात बोललो असतो, तर संपूर्ण महाराष्ट्रात त्याचा परिणाम झाला असता. महायुतीचे वातावरण बिघडले असते. आम्ही तोड दाबून बुक्क्यांचा मार सहन केला. त्यामुळे शिवसेनेच्या कार्यकर्त्यांमध्ये प्रचंड नाराजी आहे.
