मुर्तीजापुर ज्वालादीप कार्यकारी संपादक विलास सावळे :सोयाबीन खरेदीच्या ग्रेडिंग संदर्भात शासनाकडून अद्याप कोणताही ठोस निर्णय झाला नसल्याने मुर्तीजापुर येथील शेतकऱ्यांमध्ये तीव्र संताप व्यक्त होत आहे. ‘नाफेड’ (NAFED) द्वारे सोयाबीनची खरेदी करताना जाचक अटी लावून माल परत पाठवला जात असल्याने शेतकऱ्यांचे मोठे आर्थिक नुकसान होत आहे.
या अन्यायाविरोधात प्रगती शेतकरी मंडळाचे अध्यक्ष राजू वानखडे यांनी आक्रमक पवित्रा घेत येत्या २ जानेवारी २०२६ रोजी नाफेड केंद्रावर भव्य ‘ट्रॅक्टर मोर्चा’ काढण्याचा इशारा दिला आहे.
नेमकी अडचण काय?
सध्या नाफेड केंद्रावर सोयाबीनची खरेदी करताना ग्रेडिंगचे निकष कडक लावण्यात येत आहेत. यामुळे अनेक शेतकऱ्यांचा माल खरेदी न करताच केंद्रावरून परत पाठवला जात आहे. यामुळे शेतकऱ्यांना वाहतुकीचा नाहक खर्च सोसावा लागत असून, कमी दरात व्यापाऱ्यांना माल विकण्याची वेळ येत आहे.
शेतकऱ्यांची मागणी
प्रगती शेतकरी मंडळाने शासनाकडे ‘कापूस योजने’च्या धर्तीवर सोयाबीनचे ग्रेडेशन करून खरेदी करण्याची मागणी केली होती. यासंदर्भात वारंवार पाठपुरावा करूनही शासनाने अद्याप कोणताही निर्णय घेतलेला नाही.
शेतकऱ्यांचा माल एफ.ए.क्यू. (FAQ) ग्रेडनुसार तातडीने खरेदी करावा. वारंवार विनंती करूनही शासन दखल घेत नसेल, तर आता शेतकरी शांत बसणार नाही. २ जानेवारीला शेतकरी आपल्या ट्रॅक्टरसह सोयाबीन घेऊन नाफेड केंद्रावर येतील आणि माल खरेदी करण्यास भाग पाडतील.” राजू वानखडे, अध्यक्ष, प्रगती शेतकरी मंडळ
आंदोलनाचे स्वरूप
शुक्रवार, दिनांक २ जानेवारी २०२६ रोजी तालुक्यातील शेकडो शेतकरी आपापल्या ट्रॅक्टरमध्ये सोयाबीन भरून नाफेड केंद्रावर धडकतील. जोपर्यंत खरेदीचा प्रश्न सुटत नाही, तोपर्यंत केंद्र सोडणार नाही, असा निर्धार शेतकऱ्यांनी व्यक्त केला आहे. या आंदोलनामुळे प्रशासनासमोर मोठे आव्हान उभे राहण्याची शक्यता आहे.
